今日好似長得滯，但係太短的話，我怕成個星期都未出完個故事，辛苦晒大家睇咁多字🙏🏻
＝＝＝＝＝＝＝
《我朋友去咗佢姐夫公司做臥底 2》
「你話之前sales team啲人做唔長，點唔長？一個星期、一個月、三個月，定係半年？」
姐夫：「咩都有呀，最慘係啱啱做夠一個月多啲就走，因為獵頭公司嘅規矩係，頭一個月內啲candidate走人，會免費搵返一個replacement，過咗一個月就冇，試過有個女仔做咗一個月零兩日然後辭職，Daniel話可能係同獵頭公司夾埋，根本一早想走，個agent叫佢捱到啱啱好過一個月。」
「嘩！啲candidate真係好過份。」
姐夫：「你都覺哩！」
「佢哋咁都留到一個月真係好過份，如果我唔係收你5萬蚊，應該一日就走咗，唔明其他新同事得萬幾蚊點解要做，搵份百佳執貨開心好多。」
姐夫終於放低手上部Switch，好認真咁望住我。
Sales team計埋我有6男2女，Daniel對上仲有個Louis係sales team大大佬，不過廢嘅，50幾歲等退休咁款，相處咗唔夠一個星期已經摸熟Louis份人－－－佢唔需要醒目嘅下屬，你要hit到兩個元素先會得到佢歡心，1）唔好製造麻煩；2）唔好功高蓋主。
呢條sales team每日仲要開好多會，但對生意完全冇幫助，純粹自high同埋predict嚟緊有幾多新客同埋幾多新單，而最詭異嘅係，你predict完A公司會落30萬貨嘅order，只係講出嚟大家打下飛機就算，冇人會follow up，唔會care係咪真係做到，一刻快感㗎啫！然後我哋啲價錢係比同行貴，行家賣嘅嘢根本一樣，問過Daniel我哋嘅優勢喺邊？佢話係服務......
我完全唔覺得我哋公司服務特別好，好多單只係友情單，舊客做落唔想轉，每個月自動波落單。有時我會諗，如果啲buyer換咗人，我哋啲生意應該會急跌。
不過算啦，我呢5萬蚊唔包幫姐夫諗生意。
6男2女嘅組合當中，有3個男人好鍾意講咸嘢，即使兩個女同事在場，佢哋都一直講埋啲低俗笑話，好記得第一日welcome lunch，Daniel唔知做咩搞爛gag，做咗個加藤鷹手勢：「我識表演魔術㗎！嗱，咁樣郁兩郁，就自然會出晒水。」
我唔知個笑點喺邊？不過其中幾個男同事都笑，正廢柴！嗰兩位女同事一個表現得好尷尬，唔知畀咩反應，另一個就低頭食飯當聽唔到，其實呢啲已經係職場性騷擾，你真係唔怪得啲人走馬燈咁轉，眼前兩位女同事都係做咗兩個月唔夠，忽然有種好無奈嘅感覺，搵食艱難，好多人都為咗生活要打份閪工，再加埋而家市道咁差，應該唔少人想走但冇條件走，裸辭隨時失業到唔知幾時，所以幾難頂都要焗住做，唉！
更吹撚漲嘅係，sales team有個WhatsApp group，第二日返工之後，佢哋加咗我入去，因為唔方便cap圖，我試下描述加我入group之後Daniel講咩？
WhatsApp group
Daniel：各位，我哋有新同事加入，佢叫阿Tim。
Daniel：講下呢個工作群組規矩先。(本來預期各同事會同我say hi問好之類，不過冇，我忍唔住自己打招呼）
Tim：大家好，多多指教🙏🏻
Daniel：呢個群組係報工作或者請假，唔好講無謂嘢。
Tim：明白
Daniel：另外，呢個群組只係報同埋聽工作指令，唔使覆任何嘢。
......姐夫，你公司真係成班智將，唔怪得個WhatsApp group係單向，得Daniel講嘢，冇人講嘢。
我哋sales team仲有一個極品男同事叫肥仔風，有一日放工落到樓下，佢問另一位女同事Cathy去邊？（係呀，佢冇問我呢啲男同事去邊？淨係問女），Cathy話約咗朋友食飯，肥仔風又再問：「去邊度食呀？」
Cathy答：「Outback之嘛！」
肥仔風：「Outback？藍㗎喎！有冇搞錯呀你！」
Cathy冇理佢，只係笑一笑。
雖然我係黃，亦冇深究Outback點解係藍，不過我仍然有一刻慶幸公司有個同道中人，話唔定下次發夢可以約埋佢。與此同時，肥仔風又話：「咁好啦！走先！仲諗住同你一齊搭地鐵出旺角。」
咪住先，你頭先屌鳩佢去Outback，而家自己搭黨鐵？？？算啦！可能佢真係生活所需，明白既，有啲嘢好難一刀切，雖然唔明點解佢唔選擇其他交通工具，因為觀塘其實有巴士同小巴出旺角，但我仍然體諒嘅，香港人，慢慢嚟啦！最緊要凝聚呢份信念同埋力量先。
隔日返到公司，reception個靚女拎住箱嘢行嚟sales team問我：「坐你後面個肥仔呢？」
「佢哋落咗樓下煲煙。」
「咁你幫我畀佢啦一陣。」
說時遲那時快，肥仔風成身煙味咁返嚟，接咗呢箱嘢，仲自己講咗句：「終於寄到嚟。」
我為咗打好關係，所以係咁易問咗句：「咩嚟㗎？」
肥仔風：「淘寶買咗個撐住MacBook Pro個啲架囉！等咗成個星期呀屌佢老味！」
？？？你屌人去藍店，你搭黨鐵都算，你淘寶？
不過後來我發覺肥仔風做嘢都係雙重標準，呢個唔講住，因為有另一單嘢，事緣某日我落辦房想拎sample，畀我見到另一位女同事Candy眼濕濕喺後樓梯喊......
#貴公司真亂
Search